Kautaman Sahabat Umar Bin Khattab - Khutbah Jum'at Bahasa Jawa

Kabeldakwah.com

Kautaman Sahabat Umar Bin Khattab.Pdf

Oleh: Ust. Dr. Abu Zakariya Sutrisno

Alih Basa Jawi: Muhammad Wasito

Khutbah Kapisan:

اَلْحَمْدُ لِلَّهِ عَلَى إِحْسَانِهِ، وَالشُّكْرُ لَهُ عَلَى تَوْفِيْقِهِ وَامْتِنَانِهِ، وَأَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيْكَ لَهُ تَعْظِيْمًا لِشَأْنِهِ، وَأَشْهَدُ أَنَّ نَبِيَّنَا مُحَمَّدًا عَبْدُهُ وَرَسُوْلُهُ، صَلَّى اللهُ عَلَيْهِ وَعَلَى آلِهِ وَأَصْحَابِهِ، وَسَلَّمَ تَسْلِيْمًا مَزِيْدًا

 يَا أَيُّهَا الَّذِينَ آمَنُوا اتَّقُوا ﷲ حَقَّ تُقَاتِه وَلا تَمُوتُنَّ إِلا وَأَنْتُمْ مُسْلِمُونَ ( ال عمران : ١۰٢)

يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيرًا وَنِسَاءً وَاتَّقُوا ﷲَ الَّذِي تَسَاءَلُونَ بِهِ وَالأرْحَامَ إِنَّ ﷲَ كَانَ عَلَيْكُمْ رَقِيبًا (النساء : ١)

يَا أَيُّهَا الَّذِينَ آمَنُوا اتَّقُوﷲَ وَقُولُوا قَوْلاً سَدِيدًا. يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ ﷲَ وَرَسُولَهُ فَقَدْ فَازَ فَوْزًا عَظِيمًا ( الاحزاب : ٧۰ - ٧١)

أَمَّا بَعْدُ :

Jama’ah ibadah Jum’ah rahimakumullah.

Langkung rumiyen sumangga kita tansah syukur dumateng Allah. Awit sedaya nikmat ingkang Allah paringaken ing kita sami.Syukur kanthi estining syukur, mboten namung ing lisan, ananging bil qolbi wal lisaani wal jawaarih , syukur ing ati, lisan lan amal perbuatan. Sak lajengipun, sholawat lan salam mugya kacurah ing panutan kita, nabi Muhammad shallallahu ‘alaihi wasallam.

Mboten katalumpen lumantar mimbar Jum’at punika, khotib ngemutaken ing diri khatib piyambak lan jama’ah sedaya, tansaha ningkataken keimanan lan ketaqwaan dumateng Allah subhanahu wa ta’ala. Taqwa punika sak sak sae- saenipun sangu ing dunya lan akhirat. Allah paring dawuh,

وَتَزَوَّدُوا فَإِنَّ خَيْرَ الزَّادِ التَّقْوَى

“Padha goleka sangu, lan temen sak becik- becike sangu yaiku takwa.” (QS. Al-Baqarah: 197)

Kaum muslimin rahimakumullah,

Ing jajaranipun sahabat Rasulullah ingkang paling utami sak pengker Abu Bakar As Siddiq njih punika Umar bin Khattab radhiyallahu ‘anhu. Kita faham punapa dereng sinten Umar bin Khattab? Panjenenganipun , sahabat nabi ingkang kasuwur kanthi ketegasanipun. Pramila panjenenganipun jejuluk al Faruq, ingkang tegesipun “yang membedakan al haq (kebenaran) dengan al batil (kebatilan). Panjenenganipun temen tegas lan kuat ing bebener ngantos- ngantos setan kemawon wedi lan mlayu. Mboten wantun nyaket napa malih hanggrudha. Ing satunggilipun hadits, Rasulullah shallallahu ‘alaihi wasallam sabda:

إِنِّى لأَنْظُرُ إِلَى شَيَاطِينِ الإِنْسِ وَالْجِنِّ قَدْ فَرُّوا مِنْ عُمَرَ

“Temen aku mangerteni setan saka golongane manungsa lan golongane jin mlayu saka ‘Umar.” (HR. Tirmidzi no. 3691. Al Hafizh Abu Thohir mengatakan bahwa sanad hadits ini hasan).

Sumangga ing khutbah singkat punika,kita simak malih saperangan kautaman Umar bin Khattab lan mugi kita saged nuladani. Kautaman Umar bin Khattab ing antawisipun:

📌Kautaman angka setunggal: Umar kalebet Khulafaur Rasyidin.

Umar bin Khattab punika salah satunggil saking sekawan Khulafaur Rasyidin (الخلفاء الراشدون‎), non injih Abu Bakar, Umar, Ustman lan Ali radhiyallahu ‘anhum ajma’in. Umar kadapuk dados Amirul mukminin (pemimpin kaum muslimin) sak pengker wafatipun Abu Bakar As Siddiq. Sedaya khulafaur Rasyidin punika manungsa ingkang mulya. Satemah Rasulullah merintahaken kita gegujengan sunnah-sunnahipun. Rasulullah paring sabda:

فعليكم بسنتي وسنة الخلفاء الراشدين المهدين عضوا عليها بالنواجذ

“Padha gujengana sunnahku lan sunnah Khulafaur Rasyidin kang lurus (antuk pituduh) lan gigiten kalawan gigi gerahamu." (HR Abu Dawud 4607 dan Tirmidzi 2676, hasan Shahih)

📌Kautaman angka kalih: Dipun jamin lumebet suwarga.

Umar ugi kapetang salah sawiji saking sedasa sahabat ingkang dijamin suwarga (العشرة المبشرون بالجنة). Rasulullah shallallahu ‘alaihi wa sallam paring sabda:

أَبُو بَكْرٍ فِى الْجَنَّةِ وَعُمَرُ فِى الْجَنَّةِ وَعُثْمَانُ فِى الْجَنَّةِ وَعَلِىٌّ فِى الْجَنَّةِ وَطَلْحَةُ فِى الْجَنَّةِ وَالزُّبَيْرُ فِى الْجَنَّةِ وَعَبْدُ الرَّحْمَنِ بْنُ عَوْفٍ فِى الْجَنَّةِ وَسَعْدٌ فِى الْجَنَّةِ وَسَعِيدٌ فِى الْجَنَّةِ وَأَبُو عُبَيْدَةَ بْنُ الْجَرَّاحِ فِى الْجَنَّةِ

“Abu Bakar ing suwarga, ‘Umar ing suwarga, ‘Utsman ing surga, ‘Ali ing suwarga, Thalhah ing suwarga, Az-Zubair ing suwarga, ‘Abdurrahman bin ‘Auf ing suwarga, Sa’ad (bin Abi Waqqash) ing suwarga, Sa’id (bin Zaid) ing suwarga, Abu ‘Ubaidah bin Al-Jarrah ing suwarga.” (HR. Tirmidzi 3747 dan Ahmad. Sanad hadits ini sahih)

Punika kautaman ingkang luar biasa. Sampun dijamin suwarga sak derengipun tilar dunya!! Non injih para penduduk surga ingkang lumampah ing bumi. Dipun sebataken ing sawijining hadits shahih bilih sampun dipun sediyaaken istana khusus ing suwarga kagem Umar bin Khattab. Abu Hurairah nerangaken, nalika kita sami ing sisihe Rasulullah shallallahu ‘alaihi wa sallam, panjenenganipun paring sabda, “Nalika turu aku ngimpi kaya-kaya aku lagi ana ing suwarga. Banjur aku nyawang sawijining wanita lagi wudhu ing istana (suwarga), nuli aku takon, ‘Duweke sapa istana iki?’ Wanita-wanita iku mangsuli, Duweke Umar.’ Banjur aku kelingan marang sifat cemburune Umar, aku nuli ngedoh (ora mlebu ) istana iku.” Umar radhiallahu ‘anhu nangis lan matur, “Punapa mungkin kula bade cemburu kalawan panjenengan duh Rasulullah.” (HR. Bukhari, no. 3242 dan Muslim, no. 2395). Subhanallah! Rikala Umar tasih gesang ing alam dunya sareng Rasulullah lan para sahabat, ananging istana kagem Umar sampun dipun siapaken ing tanah suwarga

📌Kautaman angka tiga: Kuat lan Tegas ing Keimanan

Umar bin Khattab sanget kuat lan tegas pendirian. Satemah ngantos setan kemawon wedi, mboten wani nyaket kangge nggrudha, kados kasebat ing hadits kala wahu. Ing hadits sanesipun, Rasulullah nate ngendika langsung dumateng Umar:

وَالَّذِى نَفْسِى بِيَدِهِ مَا لَقِيَكَ الشَّيْطَانُ قَطُّ سَالِكًا فَجًّا إِلاَّ سَلَكَ فَجًّا غَيْرَ فَجِّكَ

“Demi Allah, saben- saben setan ketemu kowe ing dalan, setan mesti milih liwat dalan liya.” (HR. Bukhari no. 3294).

Subhanalllah!! Punika wujud kautaman ingkang agung saking sahabat Umar. Sekedar papasan ing dalan,setan mboten wani.

📌Kautaman angka sekawan.

Mbangkitaken kamulyaning Islam.

Rumiyen, ing awal-awal Islam kaum muslimin punika taksih lemah. Sak pengker Umar mlebet Islam ,kaum muslimin rumaos langkung kuat. Saking‘Abdullah bin Mas’ud radhiyallahu ‘anhu,ngandharaken,

مَا زِلْنَا أَعِزَّةً مُنْذُ أَسْلَمَ عُمَرُ

“Kita- kita terus ngrasaake ajining diri kang duwur , sak wise Umar mlebu Islam.” (HR. Bukhari, no. 3863)

Rasulullah nate ngabaraken ing sawijining hadits, bab luasipun pengaruh Islam ing mangsa Umar bin Khattab radhiallahu ‘anhu. Rasulullah ngendika, “Aku ngimpi lagi ngudhukake timba menyang jeroning sumur kang ditarik nganggo kerekan. Banjur Abu Bakar tumeka njupuk banyu saka sumur iku sak timba utawa rong timba, lan katon lemes awake nggered timba iku -semoga Allah Ta’ala mengampuninya-. Banjur Umar bin al-Khattab tumeka ,njupuk banyu sak akeh- akehe. Aku durung nate ngerti pemimpin abqari (pemimpin kang kuat) kang trengginas, sahingga saben uwong bisa ngombe sak katoke lan uga bisa ngombeni unta-untane.” (HR. Bukhari, no. 3682)

Umar tinuding supados nggantikaken Abu Bakar minangka khalifah kedua ing sejarah Islam. Umar hamimpin sedasa (10) tahun (13-23H). Selami pemerintahan Umar, kekuasaan Islam tuwuh lan maju pesat. Islam ngrebut Mesopotamia lan sebagian Persia saking tangan dinasti Sassanid saking Persia (ingkang mungkasi masa kekaisaran sassanid) sarta ngrebut nguwasani Mesir, Palestina, Syria, Afrika Utara lan Armenia saking kekaisaran Romawi (Byzantium). Rikala semanten wonten kalih negara adi daya njih punika Persia lan Romawi. Hananging kekalihipun sampun dipun taklukaken dening kekhalifahan Islam pimpinanipun Umar.

📌Kautaman angka gangsal:

 Pikantuk kathah ilham.

Dipun riwayataken saking Abu Hurairah radhiallahu ‘anhu, Rasulullah shallallahu ‘alaihi wa sallam paring sabda,

إِنَّهُ قَدْ كَانَ فِيمَا مَضَى قَبْلَكُمْ مِنَ الأُمَمِ مُحَدَّثُونَ، وَإِنَّهُ إِنْ كَانَ فِى أُمَّتِى هَذِهِ مِنْهُمْ، فَإِنَّهُ عُمَرُ بْنُ الْخَطَّابِ

“Sak temene ing antarane wong-wong sak durungmu ,ana seperangan manungsa kang kaparingan ilham. Menawa salah sawiji saka umatku kaparingan ilham, hiya Umar bin Khatthab kang pantes nampa.” (HR. Bukhari, no. 3469)

Makaten, kautaman- kautaman Umar bin Khattab radhiyallahu ‘anhu ingkang saged kita aturaken ing khutbah kapisan punika, mugi manfaat lan kita saged mendet piwulangipun..

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ فَاسْتَغْفِرُوْهُ إِنّهُ هُوَ الْغَفُوْرُ الرّحِيْمِ

 

Khutbah Kapindho:

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهْ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ. وَأَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ

Jama’ah ibadah Jum’ah rahimakumullah.

Manungsa terbaik saking umat punika non injih para Sahabat Rasulullah. Rasulullah shallallahu ‘alaihi wasallam paring sabda:

خَيْرُ النَّاسِ قَرْنِي، ثُمَّ الَّذِينَ يَلُونَهُمْ، ثُمَّ الَّذِينَ يَلُونَهُمْ

“Sak becik- becike manungsa yaiku kang urip ing jamanku. Banjur sak wise lan sak wise maneh.” (HR Bukhari dan Muslim)

Sedaya sahabat Nabi punika manungsa pilihan lan piyantun ingkang nggadhahi kautaman ingkang kathah sanget. Napa malih ( kalih) sahabat ingkang paling nonjol njih punika Abu Bakar lan Umar. Para sahabat sepakat bilih piyantun kalih kasebat, punika piyantun ingkang paling mulya sak pengker Nabi. Piyantun kekalih kala wahu asring ngancani Rasulullah ing momen-momen penting ing sejarah Islam. Ngantos- ngantos saksampunipun piyantun-piyantun kala wahu pinundhut, dipun kuburaken ing papan ingkang sami, njih punika ing kamaripun Ummul Mukminin Aisyah radhiyallahu ‘anha. Ali radhiyallahu ‘anhu nate ngendika, bilih piyambakipun asring mireng Rasulullah shallallahu ‘alaihi wa sallam paring sabda,

ذَهَبْتُ أَنَا وَأَبُو بَكْرٍ وَعُمَرُ، وَدَخَلْتُ أَنَا وَأَبُو بَكْرٍ وَعُمَرُ، وَخَرَجْتُ أَنَا وَأَبُو بَكْرٍ وَعُمَرُ

“Aku lunga kalawan Abu Bakar lan Umar, aku mlebu kalawan Abu Bakar lan Umar, lan aku metu kalawan Abu Bakar lan Umar.” (HR. Bukhari, no. 3685)

Rasulullah shallallahu ‘alaihi wa sallam piyambak nate sabda, “Umatku kang paling pangasih yaiku Abu Bakar lan kang paling tegas negakake agamane Allah yaiku Umar.” (HR. Tirmidzi dalam al-Manaqib, hadits no. 3791). Sanadyan kasuwur kanthi kategasanipun, Umar punika pribadi ingkang lembut lan ajrih dumateng Allah. Umar asring nangis karana Allah. Umar punika jarang ngguyu lan gojekan, ing cincinipun tinulis “Cukup kematian dadi pepiling kanggomu he Umar (kafaa bil mauti waa’izhon yaa ‘Umar).”

Cekap semanten khutbah ingkang saged kaaturaken. Mugi- mugi Allah hangridhai sedaya sahabat Rasulullah lan mugi-mugi kita saged nuladani. Amien. Sumangga kita tutup khutbah punika kanthi sholawat lan doa.

إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَا أَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا

اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ. وَبَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ، وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدّعَوَاتِ

رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلّاً لِّلَّذِينَ آمَنُوا رَبَّنَا إِنَّكَ رَؤُوفٌ رَّحِيمٌ

رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ

رَبَنَا ءَاتِنَا فِي الدّنْيَا حَسَنَةً وَفِي اْلأَخِرَةِ حَسَنَةً وَقِنَا عَذَابَ النّارِ

وَصَلَّى اللَّهُ عَلَى نَبِيِّهِ مُحَمَّدٍ وَآخِرُ دَعْوَانَا أَنِ اَلْحَمْدُ لِلَّهِ رَبِّ اَلْعَالَمِينَ